ಮೊದಲ ಹೆಜ್ಜೆ ನಾವಿರಿಸೋಣ

ಕನ್ನಡ ಶಾಲೆ ಉಳಿಸುವ ಹೋರಾಟಕೆ ನಾ ಮುಂದೆ

ನನ್ನ ಮಕ್ಕಳನು ಹಳದಿ ವ್ಯಾನು ಹತ್ತಿಸಿ ಈಗ ಬಂದೆ!

ಕನ್ನಡದ ಉಳಿವಿಗೆ ಮಾಡುವೆ ಭಾಷಣ ಮೇಜುಕುಟ್ಟಿ

ಮಕ್ಕಳ ದುಬಾರಿ ಶಾಲೆಗೆ ಲಕ್ಷಗಟ್ಟಲೆ ಫೀಸು ಕಟ್ಟಿ

ಕನ್ನಡ ಶಾಲೆಗೆ ಕಳಿಸಲು ಹೆಚ್ಚು ಬಡವರಿಲ್ಲ

ಬಿಪಿಎಲ್ ಕಾರ್ಡುಗಳ ಸಂಖ್ಯೆ ಇಳಿಯುವುದೇ ಇಲ್ಲ

ಈ ಬೂಟಾಟಿಕೆಯಿಂದಲೇ ಕನ್ನಡ ಶಾಲೆಗೆ ಆಪತ್ತು

ಕೊಟ್ಟರೇನು ಬಂತು ನೂರಾರು ಪುಕ್ಕಟೆ ಸವಲತ್ತು

ತನ್ನ ಭಾಷೆಯಲಿ ಕಲಿತಾಗ ಮಾತ್ರ ಪರಿಪೂರ್ಣ ಕಲಿಕೆ

ಕಂಠಪಾಠಕೆ ಜೋತುಬೀಳದೆ ಬೆಳೆಯಲಿ ಸ್ವಂತಿಕೆ

ಸಾಕೇ ಸುಕ್ಕಿರದ ಸಮವಸ್ತ್ರ ಬೂಟುಕೋಟು ಓರಣ

ಬೇಡವೇ ನುರಿತ ಬೋಧನೆ ಅನುಭವದ ಹೂರಣ

ತಿಳಿವು ಆಳಕ್ಕಿಳಿದರಲ್ಲವೇ ಆಗುವುದು ಪಕ್ವ ಕಲಿಕೆ

ಬರಿದೇಕೆ ಕಳೆಯುವಿರಿ ದುಡಿದು ಕೂಡಿಟ್ಟ ಗಳಿಕೆ

ಚೆಂದವಿದ್ದರೆ ಸಾಕೇ ಪುಸ್ತಕದ ಹೊದಿಕೆ

ಆಗಬೇಡವೆ ಅರ್ಥಪೂರ್ಣ ಕಲಿಕೆ

ಸ್ವಚ್ಚಂದ ನಡಿಗೆ ಆಟಪಾಠಗಳಲಿ ಬಾಲ್ಯ ಅರಳಲಿ

ಬದುಕ ಕಲಿಸುವ ಕನ್ನಡ ಶಾಲೆಗಳತ್ತ ದೃಷ್ಟಿ ಹೊರಳಲಿ

ಕನ್ನಡ ಶಾಲೆಯೆಡೆಗೆ ಹೆಜ್ಜೆ ನಮ್ಮಿಂದ ಮೊದಲಾಗಲಿ

ಆಂಗ್ಲಭಾಷೆಯಲೇ ಭವಿಷ್ಯವೆಂಬ ಭಾವ ಬದಲಾಗಲಿ

************************

ಸುಜಾತ ಬಿ.

ಸ.ಹಿ.ಪ್ರಾ. ಶಾಲೆ. ಗಂಡಘಟ್ಟ

ಚಾರಣದ ಅನುಭವ

ಪ್ರತಿನಿತ್ಯ ಶಾಲೆಗೆ ಹೋಗುವಾಗ ಗಂಡಘಟ್ಟ ಸೈಟ್ ನ ತಿರುವಿನಲ್ಲಿ ಒಮ್ಮೆ ದೂರದ ದಿಗಂತದೆಡೆ ದೃಷ್ಟಿ ಹಾಯಿಸಿದಾಗೆಲ್ಲ ಕೈ ಬೀಸಿ ಕರೆಯುತ್ತಿದ್ದಂತೆ ಭಾಸವಾಗುತ್ತಿದ್ದ ನರಸಿಂಹ ಪರ್ವತವನ್ನು ಏರುವ ಅಸೆ ಅಂತೂ ಇಂತೂ ಕೈಗೂಡಿತು. ಮಹಾ ತಪಸ್ವಿಗಳಾದ ವಿಭಾಂಡಕ ಋಷಿಗಳ ತಪೋಭೂಮಿ, ಪಾದಸ್ಪರ್ಶದಿಂದಲೇ ಮಳೆ ತರುವ ಮಹಾಮಹಿಮರಾದ ಶ್ರೀ ಋಷ್ಯಶೃಂಗರು ನೆಲೆಸಿದ ಪವಿತ್ರ ಭೂಮಿ ನರಸಿಂಹ ಪರ್ವತ. ವಿಭಾಂಡಕ ಮುನಿಗಳ ತಪಸ್ಸಿಗೆ ಮೆಚ್ಚಿ ಶ್ರೀ ಲಕ್ಷ್ಮಿ ನರಸಿಂಹ ಪ್ರತ್ಯಕ್ಷರಾದುದರಿಂದ ಈ ಪರ್ವತಕ್ಕೆ ನರಸಿಂಹ ಪರ್ವತವೆಂದು ಹೆಸರಾಯಿತಂತೆ. ಕಳೆದ ವರ್ಷ ಶೃಂಗೇರಿ ಜಗದ್ಗುರುಗಳಾದ ಶ್ರೀ ಶ್ರೀ ವಿಧುಶೇಖರ ಭಾರತಿಯವರು ಅಲ್ಲೇ ವಾಸ್ತವ್ಯ ಹೂಡಿ ಪೂಜೆ ಕೈಂಕರ್ಯ ನೆರವೇರಿಸಿದ್ದು ಕೇಳಿ ಒಮ್ಮೆಯಾದರೂ ಪರ್ವತಕ್ಕೆ ಹೋಗಬೇಕೆಂಬ ಅಸೆ ಬಲವಾಯಿತು.

ಪ್ರತಿ ವರ್ಷ ಏಳನೇ ತರಗತಿಯಲ್ಲಿ ಬಚೇಂದ್ರಿ ಪಾಲ್ ಪಾಠ ಮಾಡುವಾಗ ಅವರು ಎವರೆಸ್ಟ್ ಏರಿದ ರೋಚಕ ಕಥೆ ಹೇಳುವಾಗಲೆಲ್ಲ ಒಮ್ಮೆ ಮಕ್ಕಳೊಂದಿಗೆ ನಮ್ಮೂರಿನ ನರಸಿಂಹ ಪರ್ವತ ಏರಬೇಕೆಂಬ ಮನಸಾಗುತಿತ್ತು. ಈ ಬಾರಿ ಮನದ ಮಾತನ್ನು ಮಕ್ಕಳೊಂದಿಗೆ ಹಂಚಿಕೊಂಡಾಗ ಖುಷಿಯಿಂದ ಮಕ್ಕಳು ಕುಣಿದರು. ಶಾಲೆಯಲ್ಲಿ ಮುಖ್ಯಶಿಕ್ಷಕರು ಮತ್ತು ಶಿಕ್ಷಕರೊಂದಿಗೆ ಚರ್ಚಿಸಿದಾಗ ನಾವು ಬರುತ್ತೇವೆಂದು ತಿಳಿಸಿದರು. ನಾವು ಪರ್ವತ ಏರಲು ನಿಗದಿಪಡಿಸಿದ ಭಾನುವಾರಗಳಲ್ಲಿ ಮೂರೂ ಬಾರಿ ಅನಿವಾರ್ಯವಾಗಿ ಹೋಗಲಾಗದೆ ಮುಂದೂಡಬೇಕಾದಾಗ, ಅಕ್ಷರಶಃ ಮಲೆನಾಡಿನಲ್ಲಿ ಮಳೆಗಾಲದಲ್ಲಿ ಕಾಣಸಿಗುವ ಜಿಗಣೆಗಳಂತೆ ಕಾಡಿದ ಮಕ್ಕಳಿಂದಾಗಿ ಈ ಭಾನುವಾರ ಹೋಗಿಯೇ ಬಿಡುವುದೆಂದು ನಿರ್ಧರಿಸಲಾಯಿತು.

ದಿನಾಂಕ 11-02-24ರ ಭಾನುವಾರ ಎಲ್ಲರು ಕಿಗ್ಗ ದೇವಾಲಯದ ಎದುರು ಬೆಳಿಗ್ಗೆ 7.30ಕ್ಕೆ ಸೇರಿದೆವು. ನಂತರ ಉಪಾಹಾರಕ್ಕೆ ಬೇಕಾದ ವಸ್ತುಗಳನ್ನು ಅಲ್ಲಿಯೇ ಇದ್ದ ಅಂಗಡಿಯಲ್ಲಿ ಖರೀದಿಸಿ ಎಲ್ಲರ ಬ್ಯಾಗ್ ನಲ್ಲಿ ಒಂದೊಂದು ಪೊಟ್ಟಣ ಇಡಲಾಯಿತು. ಎಲ್ಲ ಸಿದ್ಧತೆ ಮಾಡಿಕೊಂಡು ಸುಮಾರು 8 ಗಂಟೆಗೆ ನಮ್ಮ ಪಯಣ ಆರಂಭವಾಯಿತು. ಪ್ರಪ್ರಥಮವಾಗಿ ಚಾರಣಕ್ಕೆ ಹೊರಟ ಖುಷಿ ಆರಂಭದ ಹೆಜ್ಜೆಗಳನ್ನು ವೇಗವಾಗಿಸಿದವು. ಸುಮಾರು ಒಂದು ಗಂಟೆಯ ತನಕ ಏರು ಹಾದಿಯಲ್ಲಿ ಕೊಂಚ ಏದುಸಿರು ಬಿಡುತ್ತ ಸಾಗಿದೆವು. 9 ಗಂಟೆಯ ನಂತರ ಸೂರ್ಯನ ತಾಪ ಮತ್ತು ಆಯಾಸದಿಂದಾಗಿ ನಮ್ಮ ತಂಡದ ಹಿರಿಯರ ನಡಿಗೆಯ ವೇಗ ಕಡಿಮೆಯಾದರೂ ನಮ್ಮ ಮಕ್ಕಳು ಅದೇ ಉತ್ಸಾಹದಿಂದ ಮುಂದೆ ಸಾಗಿದರು. ಇನ್ನೇನು ನರಸಿಂಹ ಪರ್ವತ ಅನತಿ ದೂರದಲ್ಲಿದೆ ಎಂದಾಗ ಬೇಗ ಏರಬೇಕೆಂಬ ಉತ್ಸಾಹವಿದ್ದರೂ ಕಿರಿದಾದ ದಾರಿಯಲ್ಲಿ ತುಸು ಪ್ರಯಾಸದಿಂದಲೇ ಸಾಗಿದೆವು. ಅಂತೂ ಇಂತೂ ನಿರಂತರ ಎರಡು ಗಂಟೆಗಳ ಕಾಲ ನಡೆದು ನಮ್ಮ ಗಮ್ಯ ತಲುಪಿದೆವು.

ಮಕ್ಕಳ ಆನಂದ, ಸಂಭ್ರಮಕ್ಕೆ ಪಾರವೇ ಇರಲಿಲ್ಲ. ಪರ್ವತದ ತುದಿಯಿಂದ ಸುತ್ತಲೂ ಕಾಣುತ್ತಿದ್ದ ರಮಣೀಯ ದೃಶ್ಯ ಮನಸೂರೆಗೊಂಡಿತು. ತುಸು ವಿಶ್ರಾಂತಿಯ ನಂತರ ನಮ್ಮ ದಣಿವೆಲ್ಲಾ ಮಾಯವಾಯಿತು. ಅಲ್ಲಿ ಪಾಪದ ಕೊಳ, ಪುಣ್ಯದ ಕೊಳ, ಈಶ್ವರ ಲಿಂಗ , ಮಹರ್ಷಿಗಳ ಪಾದದ ಗುರುತು, ವೈವಿಧ್ಯಮಯ ಸಸ್ಯಗಳು, ಬಗೆಬಗೆಯ ಕಲ್ಲುಗಳನ್ನು ವೀಕ್ಷಿಸಿದೆವು. ಅಲ್ಲಿಯೇ ತಂಪು ಪಾನೀಯ ತಯಾರಿಸಿ ಕುಡಿದೆವು. ನಂತರ ಸಮನ್ಯು ಸಿದ್ದಪಡಿಸಿದ್ದ ಅವಲಕ್ಕಿ ಗೊಜ್ಜನ್ನು ಕಲಸಿ ರುಚಿಯಾದ ಅವಲಕ್ಕಿ ತಯಾರಿಸಿ ಮೊಸರಿನೊಂದಿಗೆ ಸವಿದೆವು. ನಂತರ ನಮ್ಮ ತಂಡದಲ್ಲಿದ್ದ ಹಿರಿಯರು ತಾವು ಬಾಲ್ಯದಲ್ಲಿ ತಮ್ಮ ಹಿರಿಯರಿಂದ ಪರ್ವತದ ಬಗ್ಗೆ ಕೇಳಿದ್ದ ಸಂಗತಿಗಳನ್ನು ನಮ್ಮ ಮಕ್ಕಳೊಂದಿಗೆ ಹಂಚಿಕೊಂಡರು. ಸ್ಥಳದ ಐತಿಹ್ಯ, ಇಂದಿಗೂ ನಡೆಯುತ್ತಿರುವ ಅಲ್ಲಿನ ಸಾಂಪ್ರದಾಯಿಕ ಆಚರಣೆಗಳು, ಪರ್ವತದಲ್ಲಿ ಒಂಟಿಯಾಗಿ ವಾಸಿಸುತ್ತಿದ್ದ ಅಜ್ಜಿಯ ಕತೆ ಮುಂತಾದ ವಿಷಯಗಳನ್ನು ನಮ್ಮೊಂದಿಗೆ ಹಂಚಿಕೊಂಡರು. ಅಜ್ಜಿ ವಾಸ ಮಾಡುತ್ತಿದುದಕ್ಕೆ ಸಾಕ್ಷಿ ಎಂಬಂತೆ ಗುಡ್ಡದ ಮೇಲೆ ಹಾಳು ಬಿದ್ದಿದ್ದ ಒಂಟಿ ಮನೆಯನ್ನು ವೀಕ್ಷಿಸಿದೆವು.

ಸುಮಾರು 3 ಗಂಟೆಯವರೆಗೂ ಅಲ್ಲಿಯೇ ಸುತ್ತಾಡಿ ನಂತರ ಪರ್ವತ ಇಳಿಯಲಾರಂಭಿಸಿದೆವು. ಕಿರಿದಾದ ಕಾಲುಹಾದಿಯಲ್ಲಿ ನಡಿಗೆ ಕೊಂಚ ಪ್ರಯಾಸವೆನಿಸಿ ಮಾರ್ಗ ಮಧ್ಯೆ ತುಸು ವಿಶ್ರಾಂತಿ ಪಡೆದು ನಂತರ ನಮ್ಮ ಪ್ರಯಾಣ ಮುಂದುವರೆಸಿದೆವು. ಸುಮಾರು 5 ಗಂಟೆಯ ವೇಳೆಗೆ ಕಿಗ್ಗ ತಲುಪಿದಾಗ ಎಲ್ಲರಿಗು ದಣಿವಾಗಿದ್ದರೂ ಮುಖದಲ್ಲಿ ಪರ್ವತಾರೋಹಣ ಮಾಡಿದ ಸಾರ್ಥಕ ಭಾವ, ಸಂತಸ ಕಾಣುತ್ತಿತ್ತು. 

ಕಾಡುವ ಮಂಡಿನೋವಿದ್ದರೂ ನಮ್ಮೊಂದಿಗೆ ಉತ್ಸಾಹದಿಂದಲೇ ಬಂದ ಮುಖ್ಯ ಶಿಕ್ಷಕರಾದ ವಿಜಯ ಮೇಡಂ,ಅತಿ ಪ್ರಯಾಸವಾದರೂ ಪರ್ವತ ಏರಲೇಬೇಕೆಂಬ ಅಸೆ ಹೊತ್ತು ನಮ್ಮೊಂದಿಗೆ ಬಂದಿದ್ದ ಮಾಲಾ ಮೇಡಂ, ಅವರನ್ನು ಜಾಗರೂಕತೆಯಿಂದ ಕರೆದೊಯ್ದ ನಮ್ಮ ತಂಡದಲ್ಲಿದ್ದ ಹರೀಶ್, ಸುಧೀರ್ ಹೆಗ್ಡೆ ಮತ್ತು ರಾಘವೇಂದ್ರ, ಮಕ್ಕಳನ್ನು ಹುರಿದುಂಬಿಸುತ್ತಾ ಸುಂದರ ಫೋಟೋಗಳನ್ನು ಸೆರೆಹಿಡಿದ ಎಸ್.ಡಿ.ಎಂ.ಸಿ ಅಧ್ಯಕ್ಷರಾದ ಜಯರಾಮ್ ಇವರನ್ನು ಒಳಗೊಂಡ ನಮ್ಮ  ಉತ್ಸಾಹಿ ತಂಡ ನಮ್ಮ ಚಾರಣದ ಅನುಭವವನ್ನು ಸುಂದರವಾಗಿಸಿತು.

ಕಾಲುನೋವನ್ನು ಲೆಕ್ಕಿಸದೆ ನಮ್ಮೊಂದಿಗೆ ಜೊತೆಗೂಡಿದ ಸುಮಯ್ಯ,ಚಾರಣ ಹೊರಡುವುದೆಂದು ನಿಶ್ಚಯಿಸಿದಾಗಿನಿಂದ ಮಕ್ಕಳಂತೆ ಸಂಭ್ರಮಿಸುತ್ತಿದ್ದ ನಮ್ಮ ಶಾಲೆಯ ಅತಿಥಿ ಶಿಕ್ಷಕರಾದ ಸುಮಾ, ಪವಿತ್ರ ಮತ್ತು ಚಿತ್ರ, ನಿರಾಯಾಸದಿಂದ ಪರ್ವತ ಹತ್ತಿ ಕುಣಿಯುತ್ತ ಬಂದ ಪುಟಾಣಿಗಳಾದ ಆದ್ಯ, ರಥಿಕ್, ಆಯುಷ್, ಭುವನ್ ಮತ್ತು ಚಾರಣದಲ್ಲಿ ನಮ್ಮೊಂದಿಗೆ ಜೊತೆಯಾದ ಎಲ್ಲರೂ ಸ್ಮರಣೀಯ ಹಾಗು ಸಂತಸದ ಅನುಭವದೊಂದಿಗೆ ಮನೆಗೆ ತೆರಳಿದೆವು. 

************************

ಸುಜಾತ ಬಿ.

ಸ.ಹಿ.ಪ್ರಾ. ಶಾಲೆ ಗಂಡಘಟ್ಟ

ಮಕ್ಕಳ ಸಾಧನೆ 2023 - 24

ಮಕ್ಕಳ ಸಾಧನೆ 2023 - 24

*ಜಿಲ್ಲಾ ಮಟ್ಟದ ಪ್ರತಿಭಾಕಾರಂಜಿಯ ಅಭಿನಯ ಗೀತೆ ಸ್ವರ್ಧೆ  ( ಹಿರಿಯರ ವಿಭಾಗ ) ಕು|| ಸಮೀಕ್ಷಾ G M 7 ನೇ ತರಗತಿ, ಜಿಲ್ಲೆಗೆ ಪ್ರಥಮ ಸ್ಥಾನ ಪಡೆದಿರುತ್ತಾಳೆ.

* ಜಿಲ್ಲಾ ಮಟ್ಟದ ಕ್ರೀಡಾಕೂಟ ( ಅಥ್ಲೆಟಿಕ್ಸ್) ಎತ್ತರ ಜಿಗಿತ ಸ್ವರ್ಧೆಯಲ್ಲಿ ಕು || ಮಂಗಳ 7 ನೇ ತರಗತಿ, ದ್ವಿತೀಯ ಸ್ಥಾನ ಪಡೆದು , ರಾಜ್ಯ ಮಟ್ಟದ ಸ್ವರ್ಧೆಯಲ್ಲಿ ಭಾಗವಹಿಸಿರುತ್ತಾಳೆ.

*ಜಿಲ್ಲಾ ಮಟ್ಟದ ಕ್ರೀಡಾಕೂಟ 400 ಮೀ ಓಟ ಸ್ವರ್ಧೆಯಲ್ಲಿ ಕು|| ಮಂಗಳ 7ನೇ ತರಗತಿ ,ತೃತೀಯ ಸ್ಥಾನ ಪಡೆದಿರುತ್ತಾಳೆ.

*ಶಾಂತಿವನ ಟ್ರಸ್ಟ್, ಶ್ರೀ ಕ್ಷೇತ್ರ ಧರ್ಮಸ್ಥಳ ಇವರು ನಡೆಸಿದ ತಾಲ್ಲೂಕು  ಮಟ್ಟದ ಚಿತ್ರಕಲೆ ಸ್ಪರ್ಧೆಯಲ್ಲಿ ಕು||ಶೃತಿ R N ಪ್ರಥಮ

*ಜಿಲ್ಲಾಮಟ್ಟದ ಸ್ವರ್ಧೆ ಶಾಂತಿವನ ಟ್ರಸ್ಟ್ - ಪ್ರೇಕ್ಷ P ಶ್ಲೋಕ ಕಂಠಪಾಠ ಸ್ಪರ್ಧೆಯಲ್ಲಿ ತೃತೀಯ

*ರಾಮನ್ ಕ್ಲಬ್ - ಸರಳ ಪ್ರಯೋಗ ಚಟುವಟಿಕೆಗಳಲ್ಲಿ ರಾಜ್ಯಮಟ್ಟಕ್ಕೆ ಆಯ್ಕೆ ಕು||ಶ್ರೀನಿಧಿ

*ತಾಲ್ಲೂಕು ಮಟ್ಟದ ಕ್ರೀಡಾಕೂಟ

ಖೋ-ಖೋ (ಬಾಲಕರ ವಿಭಾಗ)              - ಪ್ರಥಮ 

ಖೋ-ಖೋ (ಬಾಲಕಿಯರ ವಿಭಾಗ )       - ಪ್ರಥಮ 

4 X 100 ಮೀ . ರಿಲೇ                                 - ಪ್ರಥಮ

400 ಮೀ ಓಟ ಕು|| ಮಂಗಳ                    - ಪ್ರಥಮ 

ಎತ್ತರ ಜಿಗಿತ ಕು|| ಮಂಗಳ                      - ಪ್ರಥಮ

ಉದ್ದ ಜಿಗಿತ ಕು|| ಅಪೂರ್ವ Y A            - ದ್ವಿತೀಯ

600 ಮೀ ಓಟ ಕು|| ಅಪೂರ್ವ Y A         - ದ್ವಿತೀಯ

200 ಮೀ ಓಟ ಕು|| ಅಪೂರ್ವ Y A        - ದ್ವಿತೀಯ

100 ಮೀ ಓಟ ಕು||ಸೌಜನ್ಯ G S             - ದ್ವಿತೀಯ 

400 ಮೀ ಓಟ ಕು|| ಶೃತಿ R N                  - ತೃತೀಯ

*ತಾಲ್ಲೂಕು ಮಟ್ಟದ ಪ್ರತಿಭಾಕಾರಂಜಿ HPS ವಿಭಾಗ

ಅಭಿನಯಗೀತೆ ಕು|| ಸಮೀಕ್ಷಾ G M           - ಪ್ರಥಮ 

ಚಿತ್ರಕಲೆ ಕು||ಶೃತಿ R N                                - ಪ್ರಥಮ 

ಇಂಗ್ಲಿಷ್ ಕಂಠಪಾಠ ಕು||ಅಪೂರ್ವ Y A   - ಪ್ರಥಮ 

ಕವನವಾಚನ ಕು||ಸ್ನೇಹ                        - ದ್ವಿತೀಯ 

ಆಶುಭಾಷಣ ಕು||ಶ್ರೀನಿಧಿ H M                   - ತೃತೀಯ 

ಭಕ್ತಿಗೀತೆ ಕು||ಪ್ರೇಕ್ಷ P                                 - ತೃತೀಯ 

ಧಾರ್ಮಿಕ ಪಠಣ ಕು||ಮಂಗಳ              - ತೃತೀಯ

*ತಾಲ್ಲೂಕು ಮಟ್ಟದ ಪ್ರತಿಭಾಕಾರಂಜಿ LPS ವಿಭಾಗ

ಅಭಿನಯಗೀತೆ ಕು||ಐಶ್ವರ್ಯ S                   - ಪ್ರಥಮ 

ಕಥೆ ಹೇಳುವುದು ಕು||ಕಾರುಣ್ಯ G R              - ಪ್ರಥಮ 

ಉರ್ದು ಕಂಠಪಾಠ ಕು||ಸನಜ್ ಬಾನು       - ಪ್ರಥಮ 

ಮಣ್ಣಿನ ಮಾದರಿ ಕು||ಹರ್ಷವರ್ಧನ್ U     - ದ್ವಿತೀಯ 

ಚಿತ್ರಕಲೆ ಕು||ಸಮೃದ್ S ನಾಯಕ್                - ದ್ವಿತೀಯ 

*ತಾಲ್ಲೂಕು ಮಟ್ಟದ ವನ್ಯಜೀವಿ ಸಪ್ತಾಹ

ವನ್ಯಜೀವಿಗಳನ್ನು ಗುರುತಿಸುವುದು ಕು||ಶ್ರೀನಿಧಿ H M     - ದ್ವಿತೀಯ 

ಚಿತ್ರಕಲೆ  ಕು||ಅರುಣ G V                                         - ತೃತೀಯ